თითოეული მათგანი ჩემპიონი სამჯერ გახდა. რაც შეეხება გამორჩეულ ფეხბურთელებს, პირველ რიგში, უნდა აღვნიშნოთ ედსონ არანტეს დო ნასიმენტო, იგივე პელე, რომელიც 7 გატანილი ბურთით ტურნირის საუკეთესო გოლეადორია. ლეგენდარულმა ფლეიმეიქერმა სანტოსის შემადგენლობაში საკონტინენტთაშორისო თასი 2-ჯერ მოიგო.
1962 წელს, ვილა ბელმიროელებმა დაამარცხეს ლისაბონის ბენფიკა, ერთი წლის შემდეგ კი - "როსონერიც". რაც შეეხება ბრაზილიელი შემტევის პერფომანსს, "არწივების" წინააღმდეგ 2 მატჩის ჯამში მან 5 ბურთი გაიტანა. სან-პაულუელებმა პირველი თამაში ანგარიშით 3:2 მოიგეს, საპასუხო კი 5:2. ლეგენდარულმა ფლეიმეიქერმა ერთ მატჩში ჰეთ-თრიკი შეასრულა.
"ალვინეგროს" ლიდერი ერთადერთია, რომელმაც საკონტინენტთაშორისო თასზე ერთ შეხვედრაში სამი გოლის გატანა შეძლო. მივადექით "შავ-წითლებთან" დაპირისპირებას, რომელიც 3 მატჩს გაგრძელდა. პირველი თამაში მოიგეს "ეშმაკებმა", ანგარიშით 4:2, საპასუხო მატჩშიც დაფიქსირდა იმავე ანგარიში, მაგრამ უკვე ლულა პერესის გუნდის სასარგებლოდ.
დაინიშნა მესამე შეხვედრა და გამარჯვებული ისევ სანტოსი გამოვიდა. ლეგენდარულმა შემტევმა მონაწილეობა მიიღო მხოლოდ პირველ თამაშში, რომელშიც 2 ბურთი გაიტანა. როგორც ვხედავთ, "ალვინეგროს" 10-იანს ამ ტურნირზე არ უთამაშია 1963 წლის შემდეგ, მაგრამ მისი რეკორდის მოხსნა ათწლეულების შემდეგაც ვერ მოხერხდა.
